பிரான்ஸிலிருந்து அவுஸ்திரேலியா நோக்கிய குவாண்டாஸ் (Qantas) விமான நிறுவனத்தின் அதிநீண்ட தூர பயன்பாட்டிற்கான Airbus A350-1000ULR விமானத்தின் பயணத்தை, உலகம் முழுவதிலும் உள்ள ஆயிரக்கணக்கான விமான ஆர்வலர்கள் நேரலை வரைபடம் மூலம் ஆவலுடன் கவனித்து வந்தனர்.
ஆஸ்திரேலியாவின் சிட்னியிலிருந்து பிரிட்டனின் லண்டன் நகருக்கு நேரடியாக இடைநில்லா விமானச் சேவையை வழங்குவதற்காக இந்த சிறப்பு விமானம் வடிவமைக்கப்பட்டுள்ளது.
பிரான்ஸின் துலூஸ் நகரிலுள்ள ஏர்பஸ் மையத்திலிருந்து வியாழக்கிழமை காலை உள்ளூர் நேரப்படி 7:33 மணிக்கு புறப்பட்ட இந்த விமானம், வெள்ளிக்கிழமை காலை 10:46 மணிக்கு அவுஸ்திரேலியாவின் மெல்போர்ன் நகரில் வெற்றிகரமாகத் தரையிறங்கியது.
இந்த வரலாற்றுச் சிறப்புமிக்க பயணம் 19 மணி நேரத்திற்கும் மேலாக நீடித்தது.
புறப்பட்ட சில நிமிடங்களிலேயே இது உலகளவில் அதிக நபர்களால் நேரலையில் கண்காணிக்கப்பட்ட விமானங்களின் பட்டியலில் முதலிடத்தைப் பிடித்தது. 10,000க்கும் மேற்பட்டோர் இதன் பயணப் பாதையை நேரலையில் தொடர்ந்தனர்.
விமான ஆர்வலர்களைப் பொறுத்தவரை, இது வெறும் ஒரு சோதனையோ அல்லது ஒப்படைப்புப் பயணமோ மட்டும் அல்ல. எவ்வித எரிபொருள் நிரப்பும் இடைநிறுத்தமும் இன்றி அவுஸ்திரேலியாவை நேரடியாக உலகின் பிற முக்கிய நாடுகளுடன் இணைக்கும் குவாண்டாஸ் நிறுவனத்தின் நீண்டகாலக் கனவுத் திட்டமான ‘புராஜெக்ட் சன்ரைஸ்‘ (Project Sunrise) என்பதன் முதற்கட்ட மைல்கல் ஆகும்.
Airbus A350-1000ULR விமானம் அதிநீண்ட தூரப் பயணங்களுக்காக பிரத்யேகமாக மாற்றியமைக்கப்பட்டுள்ளதால், இதனால் தொடர்ந்து 20 மணி நேரம் வரை காற்றில் பறக்க முடியும்.
இந்த விமானத்தைப் பயன்படுத்தி சிட்னி மற்றும் லண்டன் இடையே நேரடி விமானச் சேவையை 2027 அக்டோபர் மாதம் ஆரம்பிக்க குவாண்டாஸ் திட்டமிட்டுள்ளது.
இத்திட்டத்தை முடிவுக்குக் கொண்டுவருவதற்கு முன், பயணிகள் மற்றும் பணியாளர்கள் மீது இத்தகைய அதிநீண்ட தூரப் பயணங்கள் ஏற்படுத்தும் தாக்கங்கள் குறித்து பல ஆண்டுகளாகக் குவாண்டாஸ் ஆராய்ச்சி செய்து வந்தது.
தற்போது அவுஸ்திரேலியா வந்து சேர்ந்துள்ள இந்த அதிநவீன ஜெட் விமானம், வணிக ரீதியிலான பயணச் சேவையில் ஈடுபடுவதற்கு முன்பாக கூடுதல் தயாரிப்புகள் மற்றும் சோதனைகளுக்கு உட்படுத்தப்படும் என அறிவிக்கப்பட்டுள்ளது.