சுவிஸில் பொதுப் போக்குவரத்து கட்டணங்கள் உயர்வு!

சுவிட்சர்லாந்தில் எதிர்வரும் டிசம்பர் மாதம் முதல் பொதுப் போக்குவரத்து கட்டணங்கள் உயர்வடையவுள்ளதாக ‘அலையன்ஸ் சுவிஸ்பாஸ்’ கூட்டமைப்பு அறிவித்துள்ளது.

எனினும், கடந்த மார்ச் மாதம் திட்டமிடப்பட்ட அளவுக்குக் கட்டணங்கள் உயர்த்தப்படவில்லை.

விலைக் கண்காணிப்பு அதிகாரியுடன் மேற்கொள்ளப்பட்ட பேச்சுவார்த்தைகளைத் தொடர்ந்து கட்டண உயர்வு வீதம் குறைக்கப்பட்டுள்ளது.

வரம்பற்ற பயண அனுமதிப்பத்திரம் (GA Travelcard – 2ஆம் வகுப்பு):

முன்னதாக 200 பிராங்க் உயர்த்தத் திட்டமிடப்பட்டிருந்த நிலையில், தற்போது 100 பிராங்க் மட்டுமே உயர்த்தப்பட்டு 4,095 பிராங்க் ஆக நிர்ணயிக்கப்பட்டுள்ளது.

• GA Travelcard (1ஆம் வகுப்பு):

முன்னதாக 330 பிராங்க் உயர்த்தத் திட்டமிடப்பட்டிருந்த நிலையில், தற்போது 6,770 பிராங்க் ஆக நிர்ணயிக்கப்பட்டுள்ளது (250 பிராங்க் அதிகரிப்பு).

• சராசரி கட்டண உயர்வு:

முன்பு அறிவிக்கப்பட்ட 3.9% என்பதற்குப் பதிலாகச் சராசரியாக 3.6% ஆகக் குறைக்கப்பட்டுள்ளது.

• அரைக்கட்டண அட்டை (Halbtax):

பெரியவர்களுக்கான ‘ஹால்ப்டேக்ஸ்’ பருவச் சீட்டின் விலை 5 பிராங்க் உயர்கிறது.

காரணம் மற்றும் பிற சலுகைகள்:

பணவீக்கம், ஊழியர் சம்பள உயர்வு, எரிபொருள், பொருட்கள் மற்றும் பராமரிப்புச் செலவுகள் அதிகரித்துள்ளதால் இந்தக் கட்டண உயர்வு தவிர்க்க முடியாதது எனத் தெரிவிக்கப்பட்டுள்ளது.

அதேவேளை, சிறுவர்கள் மற்றும் குடும்பங்களுக்கான கட்டணங்களில் பெரிய மாற்றம் இருக்காது. மேலும், சுவிஸ்  ரயில்வே (SBB) 2027 ஆம் ஆண்டில் 90 மில்லியன் பிராங்க் மதிப்பிலான தள்ளுபடி பயணச்சீட்டுகளைப் பொதுமக்களுக்கு வழங்கத் திட்டமிட்டுள்ளது.

கடைசியாகச் சுவிட்சர்லாந்தில் கடந்த 2023 ஆம் ஆண்டின் பிற்பகுதியில் கட்டணங்கள் உயர்த்தப்பட்டிருந்தமை குறிப்பிடத்தக்கது.