மஹர சிறைச்சாலையில் ஏற்பட்ட பதற்றமான மற்றும் கலவர சூழல் முழுமையாகக் கட்டுப்பாட்டுக்குள் கொண்டுவரப்பட்டுள்ளதாகவும், அனைத்துக் கைதிகளும் தங்களது சிறைக் கூடங்களில் அடைக்கப்பட்டுள்ளதாகவும் பொலிஸார் தெரிவித்துள்ளனர்.
இருப்பினும், பாதுகாப்பு நடவடிக்கைகளுக்காக மஹர பகுதியிலுள்ள சில கிராம சேவகர் பிரிவுகளில் விதிக்கப்பட்ட பொலிஸ் ஊரடங்குச் சட்டம் மறுஅறிவித்தல் வரை தொடரும் என அறிவிக்கப்பட்டுள்ளது.
கடந்த வெள்ளிக்கிழமை மாலை (01) கைதிகளுக்கும் சிறைச்சாலை அதிகாரிகளுக்கும் இடையே ஏற்பட்ட தர்க்கத்தைத் தொடர்ந்து சிறைச்சாலையினுள் கடும் பதற்றம் உருவானது.
இச்சம்பவத்தின் போது காயமடைந்த 7 கைதிகள் ராகம போதனா மருத்துவமனையில் அனுமதிக்கப்பட்ட நிலையில், சிகிச்சை பலனின்றி ஒரு கைதி உயிரிழந்துள்ளார்.
கலவரத்தின் போது கைதிகள் சிலர் பிரதான ஜெயிலரின் அலுவலகம் மற்றும் சிறைச்சாலையின் ஒழுக்காற்றுப் பிரிவு ஆகியவற்றுக்குத் தீ வைத்துள்ளதாக தகவல்கள் தெரிவிக்கின்றன.
நிலைமையைக் கட்டுப்படுத்தவும் அமைதியை நிலைநாட்டவும் இலங்கை பொலிஸார், பொலிஸ் விசேட அதிரடிப் படையினர் மற்றும் இலங்கை இராணுவத்தினர் கடமையில் ஈடுபடுத்தப்பட்டனர்.
மேலும், வான்வழியாகக் கண்காணிப்பதற்காக இலங்கை விமானப்படையின் ‘பெல் 412’ (Bell 412) ஹெலிகாப்டர் மற்றும் ட்ரோன்கள் (Drones) பயன்படுத்தப்பட்டன.
சிறைச்சாலையிலுள்ள கைதிகளைப் பார்ப்பதற்காக வந்த உறவினர்களுக்கு அனுமதி மறுக்கப்பட்டதால், அவர்கள் சிறைச்சாலைக்கு வெளியே திரண்டனர். இதனால் பொலிஸாருக்கும் அப்பகுதி மக்களுக்கும் இடையே தர்க்கம் ஏற்பட்டது.
சிறைச்சாலையினுள் துப்பாக்கிச் சூடு போன்ற பலத்த சத்தம் கேட்டதையடுத்து, உறவினர்களும் அப்பகுதிவாசிகளும் பொலிஸாரின் தடைகளை மீறிச் செல்ல முயன்றனர். பாதுகாப்புப் படையினர் நிலைமையைக் கட்டுப்படுத்த முயன்றபோது, சிலர் அவர்கள் மீது கற்களை வீசித் தாக்குதல் நடத்தியதாகவும் தெரிவிக்கப்படுகிறது.
பாதுகாப்பைக் கருதி பின்வரும் கிராம சேவகர் பிரிவுகளில் மறுஅறிவித்தல் வரும் வரை பொலிஸ் ஊரடங்கு அமலில் இருக்கும்:
- 246 கெண்டலியத்த வீதி மேற்கு (Kendaliyadda Road West)
- 246C கெண்டலியத்த வீதி வடக்கு (Kendaliyadda Road North)
- 181G தம்புவ (Dambuwa)