சுவிட்சர்லாந்தின் சூரிச் நகரத்தில் வசிக்கும் ஆவணங்களற்ற புலம்பெயர்ந்தோருக்கு நிதி உதவி வழங்கி ஆதரவளிப்பதற்காக நகர நிர்வாகம் மேற்கொண்ட இரண்டாவது முயற்சியும் நீதிமன்றத்தால் நிராகரிக்கப்பட்டுத் தோல்வியில் முடிவடைந்துள்ளது.
சூரிச் நகரச் சபை தாக்கல் செய்த மேல்முறையீட்டு மனுவைத் தள்ளுபடி செய்த சூரிச் நிர்வாக நீதிமன்றம், இந்த உதவித் திட்டம் உயர்மட்டச் சட்டங்களுக்குப் புறம்பானது எனத் தீர்ப்பளித்துள்ளது.
சூரிச் நகரச் சபை திட்டமிட்டிருந்த அடிப்படை வாழ்வாதார நிதி உதவித் திட்டம், சுவிஸ் மத்திய அரசு சட்டம் மற்றும் மாநிலச் சட்டங்களுக்குப் புறம்பானது என நீதிமன்றம் சுட்டிக்காட்டியுள்ளது.
ஆவணங்களற்ற மக்களுக்கு இத்தகைய வாழ்வாதார உதவிகளை வழங்குவதற்கான சட்டப்பூர்வ அதிகாரம் உள்ளூர் நகராட்சிகளுக்குக் கிடையாது எனத் தெரிவிக்கப்பட்டுள்ளது.
இத்திட்டம், புலம்பெயர்வோர் அதிகாரிகளுக்குக் கட்டாயமாகத் தகவல்களைத் தெரிவிக்க வேண்டிய சட்டப்பூர்வ கடமைகளைத் திசைதிருப்பும் வகையில் உள்ளது என்றும் நீதிமன்றம் கவலை தெரிவித்துள்ளது.
ஆவணங்களற்ற மக்களுக்கு உதவ சூரிச் நகரம் முயன்று நீதிமன்றத்தில் தோல்வியடைவது இது முதன்முறையல்ல.
கொரோனா பெருந்தொற்றுக் காலத்தில் நகர நிர்வாகம் மேற்கொண்ட முதல் முயற்சி, மாவட்ட நீதிமன்றத்தால் தடுக்கப்பட்டது. அப்போது எதிர்த்து மேல்முறையீடு செய்வதற்கான காலக்கெடுவை நகரம் தவறவிட்டது.
தற்போது நிர்வாக நீதிமன்றத்தால் நிராகரிக்கப்பட்டுள்ள இந்தத் தீர்ப்பை எதிர்த்து, சூரிச் நகரம் சுவிட்சர்லாந்தின் நீதிமன்றத்தில் மீண்டும் மேல்முறையீடு செய்ய வாய்ப்புள்ளது.